viernes, 16 de agosto de 2019

NUN SEAS BABAYU Y DEXA QUE CANTE’l GALLU


Los tiempos nun son los que yeren, pa bien o pa mal, tomen otru rumbu, xente nuevo, diseñu 3D, poliestireno... Pero lo que nun pue cambiar ye l’espíritu. El descensu ye una folixa que dende qu’entamó fue un fervederu d’actualidá, de burlla, sátira.


En 2019 en Tolivia, quiximos tornar esi alma que venía escaeciéndose dende va unos años p'acá. Y ya de pasu, que Maro Buelga (que yo sí pongo nomes, anque manquen sensibilidaes) quedare descansáu, cola d’años que llevaba cascando por baxar un tema d’actualidá...
Facéi memoria dientro'l balagar d’información cola que mos bombardeen tolos díis. D’una prestosa noticia na que los protagonistes yeren un hosteleru d’un pueblu de cuyu nome nun quiero alcordame, un gallu y unos turistes de la meseta col sueñu llixeru. ¡Vínomos como anillu al deu! Teniendo alredor a xente como Quillo y dalgún más, la comedia taba fecha.


Como decía, los tiempos nun son los que yeren, y un exemplu de que nun siempre ye pa bien, ye que nesta sociedá del azogue, nun hai manera xuntase a tomar un culete sidra, y ya va dos o tres años que los “brainstorming”, (perdonái l’anglicismu) nun son alredor d’un platu callos y una botella sidra no de Marga (ya vos val) sinon por un grupu Whatsapp, que los meses alredor del descensu fai fumu.


Con too esto, el poliestireno, el grupu Whatsapp de los coyones, el diseñu 3D y demás moderneces varies, voi dexavos esti porráu de semeyes porque'l restu la hestoria teneisla en cualesquier añu que pinchéis d’esti blog. La sangría, si pue llamase asina, les teyaes, les voces, les rises... Son lo mesmo dende l’añu 82 qu’entamó toda esta gaita que tantu mos presta, con distintos protagonistes, toos coles mesmes ganes de pasalo bien y tirar por esti pueblu nuestru tan afayaizu.


SANTI










































































































No hay comentarios:

Publicar un comentario