Esti añu tocaba tema históricu, faciendo
una galera romana que fuere lo más llarga posible. Traxéronse dos postes de los
del teléfonu, d’ocho metros, pa facer la base. La galera tenía alantre un
espolón de casi tres metros de llargo y una popa que también sobresalía hacia
atrás. Los guajes diben montaos agarraos a los remos. Por primera vez,
empezaron a gastase perres en materiales procedentes de casa Jovino y casa
Galván, principalmente. El barcu llamábase “Calanus”, dao que naquella época
tol mundu usaba la palabra “calano” como sinónimu de “zamarro” o “bartolo”.
La xente esmeróse a la hora de vistise de
romanu, con cascos, coraces, espades, capes coloraes, túniques, etc. Mario diba
d’emperador, echáu enriba una mesa con ruedes, comiendo uves. Dos burros
tiraben d’un carru romanu como los de Ben Hur. Rubén y Tocata diben de
gladiadores, otros de soldaos, otros d’esclavos, de poetes, etc.